Во рамките на проектот за децентрализирана соработка меѓу регионот Долна Нормандија и Македонија се издаде Прирачник за Вики кој ќе служи како помошна алатка во процесот на збогатување на содржините за општините во Македонија.

Оваа потреба дојде оттаму што во повеќе општини во Македонија, единствен извор за информации се веб-сајтовите на локалната самоуправа, кои ретко се ажурираат. Освен тоа, недостигаат веб-простори за заедничка комуникација.

Поаѓајќи од успехот на слободната енциклопедија Википедија, како и некои локални вики-портали (на пр. Wikimanche), Фондацијата Метаморфозис сака да ја промовира вики-технологијата како евтино и ефикасно решение за овие проблеми и поради тоа го создаде Wiki.mk, кој опфаќа поставување повеќе вики-портали непосредно достапни на локалните заедници.

Прирачникот им е наменет на учесниците на обуките за wiki.mk кои се реализираа во април оваа година, но и на сите идни волонтери кои сакаат да придонесуваат за својот град. Освен електронски, тој ќе биде достапен и во печатена варијанта, и тоа на македонски и на албански јазик.

Овој проект се реализира во соработка со Викимедија Македонија, која е задолжена за техничката реализација и за теренските подготовки, како и со повеќе други невладини организации на локално ниво.